[东方日报]紐維爾舊生作客聖算高

紐維爾舊生作客聖算高
2012/06/15文:渡邊年
阿根廷甲組秋季聯賽周六清晨上演兩仗，心水係紐維爾舊生作客聖馬田聖祖安，平手盤撐客軍。紐維爾舊生贏波就可以做「一日一哥」，今場絕不留手，聖馬田聖祖安近況飄忽，近排所贏嘅都係弱旅，面對前列分子冇着數。

聖馬田欺善怕惡
紐維爾舊生現時排第4位，只落後榜首小保加2分，仍有爭標希望，如果今仗作客聖馬田聖祖安全取3分，更可以起碼上一日榜首，決心不容懷疑。紐維爾舊生今仗有中場柏利蘭奴停賽後復出，另一中場史柏杜迪亦傷愈可以隨時上陣，令紐軍攻守更添威力。

聖馬田聖祖安近6仗贏咗3場，但所贏球隊只係奧林普、班菲特及葛度爾古斯3支榜末球隊，叻極有限，佢哋對住沙蘭迪兵工廠、男生隊及沙士菲等前列球隊全數敗陣，今仗面對強隊，相信惡唔出樣。

拉魯斯主W揸得過
另一場拉魯斯對聖達菲聯，兩軍雖然排名只係相差一位，但拉魯斯主場錄得6連勝，聖達菲聯近5作客未贏過，如此分野，建議取1.7倍主W。