歐國盃：俄羅斯出局再證波係圓嘅
2012/06/18文:黃興桂
波係圓嘅，球場內乜嘢事都可能發生，歐國盃A組，俄羅斯曾備受睇好可以首名出線，點知來到第三場竟然撻Q，最終出局收場。俄羅斯佔盡優勢，但成為輸波一方，呢種情況喺歐聯及聯賽等賽事，都經常見到。再次證明足球比賽，唔係睇形勢，而係最後一腳埋門把握力。
希臘遇B組首名唔樂觀
俄羅斯領隊艾禾卡特都好明白呢個道理，仍然力撐球員表現好，奈何入唔到波，所以有時盲目追捧進攻場面好嘅球隊，往往跌爛眼鏡，滿地屍骸，並唔明智。反而希臘沿用04年奇迹捧盃戰術，攻勢唔需要多，一腳就攞對手命，跟住就死守到尾，亦奈佢哋唔何。
不過希臘晉級八強，遇上B組首名，更加難踢，前景唔樂觀。至於主辦國波蘭三戰都贏唔到，可見佢哋未返到70年代全盛時期水準，需要繼續努力。
今晚C組賽事，可能出現三隊同得五分情況，需要計對賽入球數字。意大利非勝不可，對住已出局嘅愛爾蘭，有力贏三、四球。至於克羅地亞對西班牙，以波講波，克羅地亞有力打和呢支衞冕勁旅，受讓半一，下盤屬不俗選擇。
金句：俄羅斯有頭威冇尾陣，希臘神話趕到尾班車
标签：
高频彩联盟
